Saturday, January 16, 2021

ஐஸ்கிரீமில் கொரோனா வைரஸ் - சாப்பிட்டவர்களை அடையாளம் காண தீவிரம்


சீனாவில் ஐஸ்கிரீமில் கொரோனா வைரஸ் கண்டுபிடிக்கப்பட்டது பெரும் அதிர்ச்சியை ஏற்படுத்தியுள்ளது

சீனாவில் ஐஸ்கிரீமில் கொரோனா வைரஸ் கண்டுபிடிக்கப்பட்டது பெரும் அதிர்ச்சியை ஏற்படுத்தியுள்ளது. தியான்ஜின் பகுதியில் செயல்படும் நிறுவனம் தயாரித்த ஆயிரத்து 812 ஐஸ்கிரீம் பாக்ஸ்கள் விற்பனைக்கு வந்துள்ளதாக தெரிவிக்கப்பட்டு உள்ளது.  

இதனையடுத்து தொழிற்சாலையில் பணியாற்றிய ஆயிரத்து 662 தொழிலாளர்கள் தனிமைப்படுத்தப்பட்டுள்ளனர்.  யாரெல்லாம் இந்த ஐஸ்கிரீமை சாப்பிட்டார்கள் என்பதை அடையாளம் காணும் பணியில் அதிகாரிகள் தீவிரமாக ஈடுபட்டுள்ளனர்.

இன்னும் 2 வாரங்களில் கொரோனா தடுப்பூசியை, நாட்டிற்கு கொண்டுவர முடியும்: சன்ன ஜயசுமன


ரஷ்யாவில் தயாரிக்கப்பட்ட COVID தடுப்பூசியை இலங்கைக்கு கொண்டு வருவதற்கு அரச மருந்தாக்கல் கூட்டுத்தாபனம் நேற்று (15) தேசிய ஔடத ஒழுங்குபடுத்தல் அதிகார சபையிடம் அவசர அனுமதி கோரியிருந்தது.

AstraZeneca மற்றும் Pfizer-BioNTech தடுப்பூசியை அடுத்த மாதம் இந்நாட்டு மக்களுக்கு ஏற்ற திட்டமிட்டுள்ளதாக COVID தடுப்பு நிர்வாக இராஜாங்க அமைச்சர் சுதர்ஷனி பெர்னாண்டோபுள்ளே இதற்கு முன்பு கூறியிருந்தார்.

AstraZeneca மற்றும் Pfizer-BioNTech தடுப்பூசிக்காக அரச மருந்தாக்கல் கூட்டுத்தாபனம் எதிர்வரும் சில நாட்களுக்குள் தேசிய ஔடத ஒழுங்குபடுத்தல் அதிகார சபையிடம் அனுமதி கோர எதிர்பார்த்துள்ளதாக ஔடதங்கள் தயாரிப்பு, விநியோகம் மற்றும் கட்டுப்பாட்டு இராஜாங்க அமைச்சர் பேராசிரியர் சன்ன ஜயசுமன தெரிவித்தார்.

இன்னும் இரண்டு வாரங்களுக்குள் கொரோனா கட்டுப்பாட்டிற்கான தடுப்பூசியை இலங்கைக்கு கொண்டுவரக் கூடியதாக இருக்கும் என அவர் கூறினார்.

Sputnik V தடுப்பூசி மாத்திரமல்லாது, AstraZeneca, Pfizer-BioNTech தடுப்பூசி பதிவிற்காகவும் தற்போது நடவடிக்கைகள் முன்னெடுக்கப்பட்டுள்ளதாக பேராசிரியர் சன்ன ஜயசுமன குறிப்பிட்டார்.

2 தடவைகள் PCR செய்தும், மொயீன் அலிக்கு கொரோனா இல்லை - இங்கிலாந்து அணியிடம் ஒப்படைக்க நடவடிக்கை


இலங்கை அணியுடனான டெஸ்ட் தொடரில் விளையாடுவதற்காக இலங்கை வந்த இங்கிலாந்து கிரிக்கெட் வீரர் மொயீன் அலிக்கு கொரோனா தொற்று இல்லை சுகாதார அமைச்சு தெரிவித்துள்ளது. 

இலங்கை வந்த நிலையில் இவருக்கு மேற்கொள்ளப்பட்ட பரிசோதனைகளில் கொரோனா தொற்று உறுதி செய்யப்பட்டதாக தெரிவிக்கப்பட்டு அவர் தனிமைப்படுத்தலுக்கு உட்படுத்தப்பட்டிருந்தார். 

இதன் காரணமாக இலங்கை அணியுடனான முதலாவது டெஸ்ட் போட்டியில் இவரால் விளையாட முடியாமல் போயிருந்தது. 

இந்நிலையில் கடந்த 24 மணித்தியாலயங்களில் அவருக்கு மேற்கொள்ளப்பட்ட இரண்டு பிசிஆர் பரிசோதனைகளிலும் அவருக்கு கொரோனா தொற்று உறுதி செய்யப்படவில்லை என சுகாதார அமைச்சு தெரிவித்துள்ளது. 

இதனால் அவரை இங்கிலாந்து அணியிடம் ஒப்படைக்க நடவடிக்கை எடுக்கப்படுவதாகவும் தெரிவிக்கப்படுகின்றது.

புலிகள் பயங்கரவாத அமைப்புத்தான் - தடையை நீடித்தது அமெரிக்கா


அமெரிக்க இராஜாங்க திணைக்களம் வெளிநாட்டு பயங்கரவாத அமைப்புகளின் பட்டியலில் மாற்றங்களை மேற்கொணடுள்ள அதேவேளை விடுதலைப்புலிகள் அமைப்பு தொடர்ந்தும் அந்த பட்டியலில் நீடிக்கின்றது

வெளிநாட்டுப் பயங்கரவாத அமைப்புகளின் பட்டியலின் கீழ் தமிழீழ விடுதலைப்புலிகள் அமைப்பு கடந்த 10.08.1997ஆம் ஆண்டு முதல் பட்டியலிடப்படுகிறது.

அமெரிக்க இராஜாங்கத் திணைக்களம் இது குறித்து வெளியிட்டுள்ள அறிக்கையில், லஸ்கர் ஐ ஜாங்வி(LJ) மற்றும் ஐஎஸ்ஐஎல் சினாய் குடாநாடு(ISIL- SP) ஆகிய பயங்கரவாத அமைப்புகளின் பெயர்களை உள்ளடக்கி திருத்தம் மேற்கொண்டுள்ளதாகவும் அறிவித்துள்ளது.

மட்டக்களப்பில் கொரோனாக்கு ஒருவர் உயிரிழப்பு - அந்தப் பகுதி உடனடியாக முடக்கம்


மட்டக்களப்பு நகர் மாநகரசபை பொதுச் சந்தைக்கு அருகிலுள்ள மூர் வீதியில் மாரடைப்பால் இறந்த 79 வயதுடைய முதியவர் ஒருவருக்கு கொரோனா தொற்று இன்று சனிக்கிழமை (16) கண்டறியப்பட்டுள்ளதையடுத்து  அந்தப் பகுதி முடக்கப்பட்டு வீதிகள் யாவும் மூடப்பட்டுள்ளதாக மட்டக்களப்பு பிராந்திய சுகாதார சேவைகள் பணிப்பாளர் நாகலிங்கம் மயூரன் தெரிவித்தார்.

குறித்த நபர் சுகயீனம் காரணமாக வீட்டில் இருந்த நிலையில் நேற்று வெள்ளிக்கிழமை இரவு மாரடைப்பினால் உயிரிழந்துள்ளார். இதனையடுத்து உயிரிழந்தவர் மீது மேற்கொள்ளப்பட்ட அன்டிஜன் பரிசோதனையில் அவருக்கு கொரோனா தொற்றுதி கண்டறியப்பட்டது .

இதனையடுத்து குறித்த நபரின் சடலம் அங்கிருந்து வைத்தியசாலைக்கு எடுத்துச் செல்லவதற்கான நடவடிக்கையினை பொது சுகாதார ஊழியர்கள் மேற்கொண்டுவருவதுடன் அந்தபகுதியில் கிருமிநாசினி தெளிக்கும் நடவடிக்கையில் ஈடுபட்டு வருகின்றதுடன் குறித்த பகுதியிலுள்ள வீதிகள் யாவும் மூடப்பட்டதுடன் உயிரிழந்தவரின் சடலத்தை பார்க்கச் சென்றவர்கள் தனிமைப்படுத்தப்பட்டுள்ளனர்

இதேவேளை மட்டக்களப்பு மாவட்டத்தில் கொரோனா தொற்றினால் இதுவரை 5 பேர் உயிரிழந்துள்ளதாக அவர் தெரிவித்தார்.



மிரிஸ்வத்தயில் 40 மில்லியன் பெறுமதியான நகையும், பணமும் கொள்ளை - 5 பொலிஸ் குழுக்கள் விசாரணை


கம்பஹா - மிரிஸ்வத்த பகுதியில் அமைந்துள்ள தனியார் நிதி நிறுவனமொன்றில் சுமார் 40 மில்லியன் ரூபாய் பெறுமதியான தங்க நகைகள் மற்றும் பணம் கொள்ளையிடப்பட்டுள்ளதாக தெரிவிக்கப்படுகிறது.

மோட்டார் சைக்கிளில் வந்த இருவர் குறித்த கொள்ளைச் சம்பவத்தில் ஈடுபட்டுள்ளதாக பொலிஸ் ஊடக பேச்சாளர். பிரதி பொலிஸ்மா அதிபர் அஜித் ரோஹண தெரிவித்தார்.

நேற்று மதியம் இந்த கொள்ளைச் சம்பவம் இடம்பெற்றுள்ளதாக அவர் தெரிவித்தார்.

முகத்தை முழுவதுமாக மறைக்க கூடிய முக கவசம் மற்றும் கருப்பு ஆடை அணிந்து வந்த இருவர் நிதி நிறுவனத்தில் புகுந்து அங்கிருந்தவர்களை துப்பாக்கி முனையில் மிரட்டி இவ்வாறு கொள்ளையில் ஈடுபட்டுள்ளதாக பொலிஸ் ஊடகப் பேச்சாளர் மேலும் தெரிவித்தார்.

சம்பவம் தொடர்பில் 5 பொலிஸ் குழுக்கள் விசாரணைகளை ஆரம்பித்துள்ளதாக பொலிஸ் ஊடகப் பேச்சாளர் பிரதி பொலிஸ்மா அதிபர் அஜித் ரோஹன தெரிவித்தார்.

மேல் மாகாணம் தவிர்ந்த நாட்டின் ஏனைய பகுதிகளில், மேலதிக வகுப்புக்களை நடத்த அனுமதி


மேல் மாகாணத்தை தவிர்ந்த நாட்டின் ஏனைய பகுதிகளில் மேலதிக வகுப்புக்களை நடத்த சுகாதார சேவைகள் பணிப்பாளர் அனுமதி வழங்கியுள்ளார். 

அதனடிப்படையில் எதிர்வரும் 25 ஆம் திகதிக்கு பின்னர் மேலதிக வகுப்புக்களை நடத்த இவ்வாறு அனுமதி வழங்கப்பட்டுள்ளது. 

ஒரு வகுப்பில் அதிகபட்சமாக 100 பேர் அல்லது 50% இருக்கை அளவிலான மாணவர்களுக்கு மாத்திரமே வகுப்புக்களை மேற்கொள்ள அனுமதி வழங்கப்பட்டுள்ளது.